- 156 -

1348. Okt. 16. Liegnitz.

Herzog Wenzel verleiht dem Liegnitzer Erbvogt Franz für seine treuen Dienste die obersten Gerichte über die Vorwerke zu Bartuschesdorf und Dornbusch

In gotis namen amen. Czu eyme ewigen gedechtnisse sulchir dinge, di geschen sint, so bekenne wir Wenczeslaus von gotis gnaden herzoge in Slesie vnde herre zu Legnicz offenbar vnde ewiclichen an disem briue allen den, vor den her wirt gelesin, daz wir von vnsin furstlichen gnadin han bedacht di dinst, di vns vnse getruwer Francze, der erbe voyt zu Legnitz, getan hat in manchir wise, vnde noch wol getun mak, vnde haben gegebin vnde geligen im vnde sinen elichen geerbin, daz recht obir di vorwerk zu Bartuschesdorf vnde zu dem Dornpusche, di in sime gute ligen vnde ouch dinst schuldik sint, ap di vorkouft adir vorgebin, adir vorwandilt werdin, so sal si der vorbenante Francze reichen adir sine geerbin vnde sal allez daz recht dar zu vnde dar ane habe, daz wir selbe dar ane gehaben mochten, vnde sal ouch von vns vnde von vnsin nachkumelingen dar ane bliben vngehindirt ewiclichen, vnde daz dise rede wizzentlich si, so habe wir disen brif dar obir heizen gebin, vnde vorsigeln, mit vnsem ingesigile. Daz ist gesehen zu Legnicz nach gotis geburt tusint vnde drihundirt jar in dem achte vnde virzigistin jare an sente Gallen tage. Dabi sint gewest her Steffan von Parchewicz, her Gawin, her Magnus, her Hannus von Swabesdorf, Steffan Trache, Heynke Abescacz vnde Sydel von Brochotendorf vnse schriber, dem dirre brif wart beuolen.

O. d. St. L. No. 67. An grüner und rother Seidenschnur das beschädigte Wappensiegel.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866